Bibinha Cabral, Nha

Tradusãu: Neidina Lopes Moniz. Revisãu: Nezi Brito

Maria Mendes Cabral 

Tarafal, Santiágu, 1899 – Tarafal, Santiágu, 1985 

Batukadera, fasidera di finason 

Nha Bibinha Cabral e un di kes nómi más antigu di batuku i finason ki txiga di konxedu i ritratádu, dipos di indipendénsa, kándu kes spreson kultural populár la dja ka éra disprezádu i riprimidu, sima ta kontiseba na tenpu kulonial. El txiga nes nóbu era i el komimora kes sinku ánu di indipendénsa di Káuberdi ku atuason na sinitiátu di Praia. Más-o-menu na kel okazion la, si bida i óbra dja stába ta sér baskudjádu pa Tomé Varela da Silva, baskudjamentu ki kába pa sér rijistádu nun libru ki publikádu sérka di dos ánu dipos di si mórti. 

Nha Bibinha komesa kánta na dolisénsa. Más, pa vólta di si 19 ánu, si noibu i futuru maridu, ki éra sakriston – debe lenbrádu li ma grexa katóliku ta kondenába batuku, pamódi el (grexa) ta atxába si dánsa (tornu) inprópi (indisenti) – proibi-l di partisipa na kes tipu di fésta la. El obadise si maridu i el fika 37 ánu lonji di batuku. Duránti txeu tenpu si maridu éra imigránti na “EUA”, i si ramésa di dinheru ta garantiba Nha Bibinha un “bida di madáma”, propetári di kása i téra. Kándu el regresa pa Káuberdi, duenti, el poteka kes propedádi pa el tenta tráta si kabésa i,  dipos di si mórti, na 1945, Nha Bibinha kába pa fika na mizéria. El ratoma si atividádi di kánta 11 ánu dipos, i kes kantiga ki, ántis éra proibidu, bira anton si gánha-pon ki ta sustentába si kabésa (duránti más di vinti ánu) i un fidju di-sel ki volta inválidu di rósas di Son Tumé i Prispi, i ki éra úniku ki sa ta restába-el, dja ki kes otu oitu fidju di-sel tanbê dja moreba. Kel informason li e di “Alsacem” (piseudónimu di Alexandre Semedo), na Voz di Povo (09.08.1986). 

El ta kantába pa un nisisidádi intrínsiku di xinti alegriâ i di afásta tristéza moral i material, i pa un nisisidádi strínsiku di el xinti si kabésa rodiádu di sabura pa alegriâ ki el ta simiába na kurason di gentis, ku si kantigas kontajianti, ki bira un prezénsa nisisári na maiór párti di féstas di si konsedju i ka so. 

            T. V. da Silva (Tomé Varela da Silva), na Ña Bibiña Kabral – Bida y Óbra 

Létras di si kantigas ta rifleti si insusésus i difikuldádis ikunómiku ki el pása pa es. Kel povuádu undi el ta viveba, Kural di Báxu, pamódi fálta di águ, kába pa bira dizértu i Nha Bibinha, sima kes otu morador di kel lokalidádi la, bai pa vila di Tarafal o otus lugár. Dja pértu di fin di si bida, el pása ta resebe un penson di Sirbisus di Ason Sosial i munisipi di Tarafal da-l un kása. 

Na febreru di 2000, pa okazion di sentinári di si nasimentu, un artigu di Alexandre Semedo na jornal Horizonte (03.03.2000) ta rakordába kel aparénsa frájil i kes benson ki el ta distribuíba pa tudu algen ki ta prosimába del: “Éra un otentiku risital di finason, riku na kontiúdu i inxinamentus, xeiu di prokupason di ivita ripitisons.” 

Si nómi ta lenbrádu na Purtugal, na munisipi di Amadóra, pa un grupu di batukadera ki txoma “Netas de Bibinha Cabral”, kiriádu na 1994, i na Káuberdi, na munisipi di Tarafal, pa un grupu di dánsa ki da si kabésa nómi di “Fidjus di Bibinha Cabral”. 

Pa konxi más

Ña Bibiña Kabral – Bida y Óbra, ICL, Praia, 1988. Organizádu pa T. V. da Silva (Tomé Varela da Silva), ku kolaborason di Horácio Santos i Alexandre Semedo. El ten informasons biográfiku, létras di kantigas i entrivistas ku i sobri Nha Bibinha Cabral. 

Songs of the badius, DVD, Gei Zantzinger/Constant Spring Productions, Devault (EUA). Dukumentário.