Tradutora: Ambrizeth Lima. Revisãu: Nezi Brito

Maria Celina da Silva Pereira 

Sal-Rei, Boa Vista, 1945-Lisboa, 2020 

Kantóra 

Kantóra y kuntadera de stória. Celina Pereira tinha dos vertente na si karrera artístiku; al izersita si vukasãu de idukadora y de militante pa defeza de memória kultural de Kabe Verde. Konte ke al desidi grava si primerre LP, al bai investiga manzurkas antige pal pude rasgata-r de skesimente. Ones depos, konte ke al ta rezidiba na rejiãu de Lisboa, al ta kuntaba stórias tradisiunal na skólas ke tinha txeu fidjes de imigrante, pa anxena novu jerasãu ker stória y pa definde diversidade kultural. Es trabódje foi rekunheside ke prêmiu y distinsãu. Al foi un daker primerre pesoa ke papia na pusibilidade de morna ser konsiderode un patrimóniu mundial. 

Celina kria ke múzikus de lóde de si pai ma de si mãe. Si avô paternu, Porfírio Pereira Tavares, padre ke furmasãu muzikal eruditu, ta tukaba txeu instrumente y al transmiti es kunhesimente pa sis fidje. Pa lóde de mãe nu ta mintâ si tiu Ramezinho, autor de Boa Vista Nha Terra ke ben ser títele de primerre single de Celina. Konte ke al iá menine, al muda pa Sãusente unde ke teve un reviravolta relijioze na família, ke spirta un interese muzikal na jóven Celina: ar ta libaba si avô ke taba mute duente pa sesãu de Centro do Racionalismo Cristão, un koza ke ka éra aseitável na greja katólka. Konte ke si avô murre, al foi rekuzode un interre katólke y kunprimente de si dezeje de ser antirrode ke paramente de saserdote. Anton, si família fasta de greja katólika y ar prusima de Igreja Nazarene, prutistante. Na Igreja Nazarene, unde ke kultu i alegre y múzika ten un papel de destake, Celina ben integra na koru infantil. Al ben ser sulista entre 11 y 19 one. “Foi un deskuberta mute pruveitoze. Nu feka ta kunxe instrumente ke nu ka ta ubiba na greja katólka y tanbe N deskubri tude kes kantóra negre mirkóne de gospel” al ta kuntaba. 

Na dékada de 1960, al ta furma komu prufesóra na Viseu, al ta regresa pa Kabe Verde, y al ta lesiuna dos one, antes de parti novamente pa Purtugal pa studa línguas. Tanbé al ta kumesa ta trabadja na TAP unde ke al ta permanese até 1996. Durante es tenpe, al ta kontinua ta kanta de manera infurmal, inisialmente sen grandes ligasãu ma meiu muzikal. Na 1976, al ta grava se primerre single. 

Al revela si lóde de kuntadera de stória ke Estória, Estória…No arquipélago das maravilhas, na 1990. Kel diske, ilustrode pa pintor David Levy Lima, já na se kapa, ta revela un grande kuidode na prudusãu – kunta ke kunplisidade de Paulino Vieira pa rekria kel anbiente de un róda de menines ta ubi stória de folklore kabuverdiane, interkalode ke temas kantóde y instrumental. Rieditode más tarde komu CD y en furmate audiulivre (livre/kasete), es trabódje traze txeu prêmiu pa es kantóra, na Itália, na Purtugal y na Mérka. Na stóde de Massachusetts, es trabódje ben ser utilizóde na insine bilinge. “Através des diske, N ba parâ na idukasãu multikultural.” Celina Pereira alinha ke filuzufia de pedagogu y viulinista Yehudi Menuhin, de kunbate agresividade na menines através de arte. Asin, al propo konta stórias, sobretude na skólas unde ke diferentes orijen de alunes ten tindênsia de kria konflite y diskriminasãu rasial. Un segunde prujete diskugráfiku nes ânbitu ta rezulta, na 2004, na Do Tambor a Blimundo (livre/CD). 

Na dékada de 1990, Celina Pereira ta atua kome jurnalista na Rádio Renascença, y al ta pruduzi y prezenta prugrama Renascença em África. Al ta afirma komu kantóra-sen rótele “kabuverdiana.” “N pude kanta un gospel ô un tema de jazz, sen diminui nha kónpe de asãu. Se mi i kantóra, N pude kanta kalkerre fórma muzikal de munde”, al ta flaba. Ma, i ke múzika de si ilha natal y pa prezerva legóde de si kunpuzitores ke, na 2013, al ta kumesa ta prepara idisãu de un albun ke ben sai na 2019: Areias mornas de Bubista. 

Desde ke al fiksa na Purtugal, Celina Pereira i un militante de kumunidade kabuverdiane rezidente la; al i sósia y fundadóra de txeu asusiasãu. Na 2003, na Dia Internacional da Mulher, 8 de Morse, al foi kondekurode pa prezidente purtugês, Jorge Sampaio, ke Medalha de Mérito, grau de kumendadóra. Al rasibe Prémio Carreira na Kabe Verde Music Award na 2014. 

Disku Iditadu  

• Boa Vista nha terra, EP, e/a, Lisboa, 1978. (y na konpilasãu Cabo Verde 82).
• Mar Azul-abri’m camim cantá mudjer’s, 1985 (partisipasãu na dos faixa).
• Força de cretcheu, LP, e/a, Lisboa, 1987.
• Estória estória…No arquipélago das maravilhas, LP, e/a, Lisboa, 1990. Na CD, Movieplay, 1999, patrusinóde pa Ministério de Cultura de Cabo Verde. Audiulivre: CIES, Roma, 1995. 
• Nos Tradiçon (konpilasãu ke temas de Estória Estória…y Força di Cretcheu). CD Lusafrica, Paris, 1994. 
• De lá para cá, Henry Records/New Morning Media, Hamburgo, 1998. ● Harpejos e gorjeios , CD, Sonovox, Lisboa, 1999. 
• Estória, Estória…Do Tambor a Blimundo, CD/livre, Tabanka, Roma, 2005. Reiditóde pa Publicar Lda., Lisboa, 2010. 
• A sereia Mánina e os seus sapatos vermelhos, CD/livre, Ed. Nuvenbre, Lisboa, 2018; id. Bilinge purtugês/kabuverdiane y versãu braille pa kes dos língua.
• Areias Mornas de Bubista, idisãu de autora, Lisboa, 2019. 
• Partisipasãu na CD Meninos d’ouro, 1991, de Raul Indipwo.
• Partisipasãu na CD Todos diferentes todos iguais (txeu artista), 1998.
• Partisipasãu na CD Lusofonia, 2000, de Martinho da Vila. 
• Partisipasãu na CD Deidda interpreta Pessoa, 2001, de italione Mariano Deidda.
• Partisipasãu na konpilasãu Chi vuile fiabi, chi vuole…Voci e narrazioni di qui e d’altravove, CD, IDEST, Florensa, 2002. 
• Partisipasãu na CD Dedo d’alma, 2003, de gitarrista purtugês Silvestre Fonseca.

Odja y obi