Ildo Lobo

Por GN em 28/10/202428/10/2024

Tradusãu: Doralisa Simas. Revizãu: Nezi Brito

Ildo Neves de Sousa Lobo

Pedra de Lume, Sal, 1953 – Praia, Santiagu, 2004

Kantor, konpuzitor

Dône de un vós sonore, abérte, putente, Ildo Lobo já éra un de kes artistas ke más palma tinha resebide de públiku kabeverdiane, mute antes de el komesa se karrera el só. De metade de anus 70 pa metade de dékada de 1990, Ildo foi, komu menbru de Os Tubarões, ka só se vós, mas tanbe kara di es grupu, y asin ke stórias des dos ka ta pode desligode de konpanher;

Ildo Lobo entra na Os Tubarões, na 1973, ta substituí se prime Luís Lobo moda vokalista. Má el tava kanta antes dise. Na adolexsênsia, na ilía de Sal, el partisipa na grupes de musins ke stava sintonizode ma kes susésu resente de Beatles; depos, na Praia, ondé el bai, na 1970, pa kontinua sés stude, el integra grupe África Show, ke éra dinamizode pa Cesário Duarte.

Os Tubarões komesa ta grava na 1976, na fazi di euforia de pós-independênsia, ke témas ke tava refleti kel momente, di tal manera ke el éra identifikode kome grupe ofisial de rejime de PAIGC/PAICV. Karrera diskográfiku des grupe dura sérka kuaze vinte óne, y, na 1994, es lansa sés últimu albun.

Três óne depos de fin de Os Tubarões, Ildo Lobo komesa se karrera a solu ke un álbun só de mornas, ke el faze na memória de sê pai, Antoninho Lobo, famoze kantor de serenatas na sê tenpe.

Depos ben Intelectual, na 2001. Na 2004, serka de dos mês antes de lansamentu de se terser albun, Incondicional, Ildo morré de repente pur kauza de prublemas kardíaku ligode ku diabete. Un tristéza grande na Kabe Verde!

Ildo Lobo tava morâ na Praia desde 1970, onde el tinha un eskritóriu de despaxante de alfândega. Ildo era stremamente pupular y desligode de fatu de sé vos ter tornode-l un ícone de un momente krusial de stória de Kabe Verde. El tava preferi butekins de pove ke anbientis más elitista. Pura y sinplesmente, el tava dzé ke éra lá é ke ses amige tava.

Ildo éra stremamente metikuloze na skolhé se repertóriu, durante se karrera, ker seja na Os Tubarões o a solu. Se vós servi de meiu pa divulgasãu de alguns de kes prinsipal konpuzitoris kabuverdiane, ke destake pa Manuel d’Novas, y tanbé pa revelâ noves talente ke ben ta surji junte má susése de ses interpretasãu: entre otes, Renato Cardoso, Kaká Barbosa, irmons Nhelas Spencer ma Alcides Spencer, Betú y, más tarde, Orlando Pantera. Na 1999, el gravâ “Ask Xanana” , ku létra de Alberto Rui Machado sobri luta de independênsia de Timor-Leste y melodia de “Djonsinho Cabral”, un de ses grande ézitu de tenpe d’Os Tubarões.

Enbóra el ka tava asumiba komu konpuzitor, Ildo Lobo konpô alguns téma, gravadu maior parti pa Os Tubarões. ¨A solo, e grava ses téma “Nha testament” na CD Nos morna y “Nha fidjo matcho”, na Incondicional. Dipos di se morte, Palácio da Cultura, na Praia, (un kaza grande ke na kel altura ta funsionaba komu séntru kultural, dipendente de Ministere de Kultura, pasâ ta ten se nome: Palácio da Cultura Ildo Lobo.

Na skérda, Ildo Lobo ta atua na dékada di 1980 (fonte: Arquivo Nacional de Cabo Verde); Na direita, el má Renato Cardoso (fonte: *Artiletra*)

De riba, fotus di Francisco Fontes, na Praia. Dibaxu, na skerda, ku Chico Tomar y Manuel Delgado, Associação Cabo-Verdiana, Lisboa, 2000 (arkivu Gláucia Nogueira); na direita, mumentu di se funeral, na Praia (fotu: Franciso Fontes)

Diskus

Nos morna, CD, Lusafrica, Paris, 1997.
Intelectual, CD, Lusafrica, Paris, 2001.
Incondicional, CD, Harmonia, Praia, 2004.
Partisipasão na CD Nôs Amor, de grupu Cabo Verde Show.
Música de Intervenção Cabo-verdiana, CD. Gravasão de “Ask Xanana” ku melodia de “Djonsinho Cabral”.
Ildo Lobo – A Voz de Ouro, un konjuntu de três CD: Nos Morna, Intelectual y Incondicional, Lusafrica, Paris, 2014.
Partisipasãu na CD, gravadu au vivu, Noite de Cabo Verde no Zénith, Lusafrica, 2001.