Gregório Vaz

San Dumingu, Santiagu 1940 – Praia, Santiagu, 2010

Konpuzitor, kantor, instrumentista (gaita)

Kodé ta siginifikâ fidju mas nobu di se mãi y dóna é avó, nalguns ilia di Kabu Verdi,  Purtantu Codé di Dóna é nómi di kaza di Gregório Vaz. E ta bibeba na intrior di Santiagu, el ta andaba tudu ilia, pé na txon, tras di batizadu ku kasamentu pa obiba tokadoris konxedu na kel altura, sima Antão Barreto, Manu Mansu, Denxe Lope, Mouzinhu Bala, Nho Lixe, Toti Lopi y Nha Maninha Santiagu… sima es, Codé di Dóna ben ser konsideradu un di kes pai di funaná tradisional y si fama, ó menus na intrior di Santiagu, ben desdi ténpu kolonial, kantu es jénuru era sinplismenti múzika di gentis ki ta trabadja na kanpu, disprezadu y pratikamenti ka konxedu na sidadi.

“Éra ténpu ki padris ta proibiba badju ku batuku y funaná”, móda Codé di Dóna konta na Cabo Verde & a Música – Dicionário de Personagens. El própi, e teve prubléma ku justisa, e prendedu, dipos di un fésta batizadu di si primeru fidju. Sen transpórti pa konbidadus, nen kama pa ospeda tantu algen, soluson éra kontinua ku fésta. Kómu donu di fésta, e toka noti interu. Kel otu dia, txiga intimason: “Fosedu kexa di mi na rejedor, 300 merés di multa. Na kel ténpu, e tinha mesmu valor ki 600 kontu, na dinheru di oxi. Ami, N ka tinha kel dinheru…” Codé di Dóna libra di prizon, ta fla oturidai ki staba ta inkiri-l pa e perguntaba fiskal ki staba na fésta kantu ki el pagaba pa entraba. Kómu el ka pagaba nada, fika provadu ma fésta éra privadu, ralatu ki e da Cabo Verde & a Música – Museu Virtual di Calú di Guida, ki konvivi ku el na si infánsia y juventudi.

Sobri valor di multa, el fla ma dinheru na kel ténpu ka tinha nen pa kel ki nu ka podi pasa sen el: ”Kenha ki tinha sapati éra so burgez, funsionáriu. Nós nu ka tinha dinheru nen pa sapati, ki fari gaita! Un gaita , na kel altura éra 1200 skudu, asi pur dianti. Na San Tomé ta kunprada pa 600 skudu” na (Cabo Verde & a Música – Disionário de Personagens).

Foi asi ki el troka un tanbor di midju pa si primeru instruméntu, na algen ki volta de San Tomé. E na kel gaita la ki el prendi toka, y, na es mesmu anu di 1959, el kria konpuzison ki é un di maior y mas konxedu múzika kauberdianu di sénpri: “Fómi di 47”, undi létra ta limia justamente un di kes mas gravi priudu di séka y fómi ki kontisi na arkipélagu na últimu séklu, y lenbra kes viaji terível pa rósa di San Tomé y Prínsipi, maior parti di bes, sen vólta.

“Éra mês di Otubru, ténpu di simentera dja pasaba y ka txobeba; N tinha kel inportânsia y txeu gana di toka. Pa mi foi sabi, pamódi kel tanbor di midju kaba sédu y gaita fika ku mi pa mutu ténpu.“

Codé di Dona, na Cabo Verde & a Música – Dicionário de Personagens

Só ku idadi di 56 anu ki Codé di Dóna konsigi idita si prumeru trabadju diskugráfiku, rizultadu di gravason fetu na 1995, na si própi kasa, la San Fransisku, pa un prugrama sobri Kauberdi, izibidu na tilivizon di Fransa. Un di kes sekson di kel prugrama éra sobri funaná – “Cap-Vert – Kodé di Dóna” mostra funaná na si stadu brutu, nada mas ki gaita, vos y ferinhu.

Na 1997, sai si sugundu disku konpaktu, nun rijistu diferenti di rakodja etnugráfiku di si trabadju di antis. Múzika tinha suporti di vióla baxu, gitara y batiria, ki inprimi-l un fórti xamamentu pa dansa, razon kuazi sértu di si suséu: 20 mil kópia bendedu na prumeru kuatu mês de 1998 (kontidadi grandi pa merkadu di téras ku tamanhu di Kauberdi o Portugal), ki obriga nobu tiraji.

Apezár di un stória muzikal kunpridu, foi susésu di grupu Férru Gaita (1997), ki ritoma akordeon (gaita), instrumentu ki ta tokada sin konpanhaméntu di otu instruméntu, y lansa un nobu ónda di funaná, ki leba un prudutor pusta na susésu komersial di un gravason ku Codé. É di li pa dianti ki ta pode fladu ma es artista li kumesa propriamente un karera muzikal ku mas projeson, mesmu ki el dja partisipaba na alguns festival li la, na Oropa, sima Fistival de Montreaux, na Suísa, na anu di 1993.

Kel susésu li kontisi kuazi vinti anu dipos di formason di Bulimundo, grupu ki fase funaná sai di interior di Santiagu, pa bira un di kes jéneru muzikal di Kabu Verdi di maior distaki. Mas Codé di Dona dja staba la finkadu, na primeru disku di kel grupu, Dja N branku dja, ku dos konpuzison: “Febri di funaná” y “Pé di pedra”, múzika ki otor so grava na fin di dékada di 1990, bespra di si raforma kómu guarda di florésta, trabadju ki el kumesa ta fosi na 1982, dipos di ben ta sprimenta di tudu un poku na djuguta ku bida.

Na 2018, konpanhia Raíz di Polon streia spetakulu Kodé di Dona, un trabadju ku só un personaji, kriadu y rializadu pa bailarinu y kuriógrafu Manu Pretu , ki teve pur bazi vida di múziku di San Dumingus. Na Agostu di 2022, kel pésa prizentadu, na Lisboa, integradu na Festival Solo Fest.

Disku Iditadu

• Cap- Vert- Kodé di Dóna , CD, Ocora /Radio France, Paris 1996. Codé di Dóna , CD, GP, Brockton , 1997.
• Djam bai, CD, GP, Brockton , 2001.
• Partisipason na CD di rakodja Cap- Vert un archipel de musiques, 1999, ku tema “Ma N’ka ta ba rubera ki tem agu tcheu”.
• Partisipason na CD kulétivu Funaná e ku nos, 2007, ku téma “ Mokeru N’ka podi ku el”, “Sodadi” y “Fomi 47”.

Múzikas

Amizadi na Korason; Bala Branka; Bela Andrade; Bia di Polon; Kori Mon; Kosta só séta; Dja N Bai; E Sima Ponba ku Mama; Febri Funaná; Fomi 47; Ma N ka ta ba rubera ki ten agu tcheu; Mokeru N ka podi ku el; Mi, N ta rabola; Minina; Kus’é k’N fose-u; N ta Bal d’Agusta; Pé di Pedra; Pulísia di Praia ; Ponba; Praia Maria é Bunita; Pretinha Lopi; Rufan Barela; Santo António la Belen; Sodadi San Fransisku; Txora; Titina Lopi, bu ten kabelu; Tra-l pé di labada, Nobu; Vaidadi; Valsa Braz di Puldina; Yota Barela.

Odja y obi