Paulino Vieira
Tradusãu, variadade de Saninklau, de Carlos Almeida
Paulino de Jesus Santos Vieira
Praia Branka, Saninklau, 1956
Tokador de txeu instrumente, konpuzitor, kantor, prudutor
El é respeitóde pa múzikes, pamode sê jenialidade, aplaudide pa públiku pa grande susése de sês konpuzisãu. Paulino Vieira é un íkone de muzka kabeverdiane de sê tenpe, onde el txâ un marka prufunde, kome konpuzitor, prudutor, arranjador, instrumentista. Multifasetóde na stúdiu, el é un entertainer na palke, sê perkurse é variode y el é un personaja kontrovérse.
Kónde el tinha uns 6 óne de idade, na aldeia de Praia Branka, Saninklau, onde el nasê, el prendê kes primere nóta de muzka ma sê pai, Santos Vieira, y un tenpe depos el konstruí un brinkede ke foi sê primere instrumente. Má na kaza tinha txeu instrumente na devéra, y kes menines tava uza-s. Kónde sê pai morrê, na 1966, Paulino ma sê armon Toy Vieira bai mora na Mindelu, onde es studâ na simenar de saleziane. Es teve kome mestre Padre Simões, ke txeu múzikes ke formâ na kel altura taba falâ. Un ote mestre ke Paulino ta falâ ke foi inportante na sê formasãu é un prufesor de nome Rodolfo (Artiletra, Outubro 1996).
Na prinsípie, joven Paulino prendê solfeje y klarinete pa loge el pasâ pa otes instrumente, flauta y órgon tê txegâ na pióne, móda el falâ na un entrevista na jornal Voz di Povo de 20.01.1990. El partisipâ na grupes de menines na skóla y, na 1970, el partisipa na fundasãu de Kings. Na 1974, Luis Morais kunvida-l pa bai pa Purtugal, onde el ma Bana kriâ, na kel altura, un nove Voz de Cabo Verde.
Nese nove versãu de Voz de Cabo Verde, Paulino ten papel de arranjador y e ta tokâ teklade, má, depos de algun tenpe, el pasâ ta tokâ otes instrumente já ke el taba duminâ es tude.
Na kel altura, menbres de grupe éra: Armando Tito (gitarra solu), John (gitarra ritmu), Bebeth (baixu) y Cabanga (bataria). Paulino ta fekâ na grupe tê sê fin na 1982.
Encontrarei o amor (1974) – un diske ekléteke kun repertóriu desde Luis Morais pa James Brown, Roberto Carlos y alguns kúnbia. El é primere LP dese Voz de Cabo Verde lisbuéta y Paulino ta parsê kome kantor, konpuzitor y intérprete (kel title dakel álbun é mesme de un téma de sê autoria y létra na purtuges), móda na LP Mascrinha, ke data de mesme óne, el é un álbun na linha de Pop na kel altura, onde el ta interpretâ témas dansante y muzka románteke latine-amerikane y brazilere. Dôs dakes téma dese diske é kunpilóde na un single txemóde Bana e Paulino.
Na final de ónes de 1970 tê prinsípie de dékada de 1990, txeu intérprete, ke krê gravâ y es ta spiâ un produtor, arranjador, múzikes, enfin, tude strutura de gravasãu muzikal, ke alguns d’es ka sta familiarizóde, é Paulino Vieira ke ta da-s tude apoie pa rializa ses prujéte. Alguns d’es imigróde na Mérka y otes kumunidade de diáspora kabeverdiane ke ta bai pa Lisboa spesialmente pa ese fin. Jente ta notâ na fixa téknika de kapa de pelumenes sinkuénta diske, ke na kel tenpe tinha un núkliu fikse de muzka kabeverdiane na Lisboa, onde ke Paulino é figura sentral, y na sê banda, múzikes móda Bebeth, Cabanga, Armando Tito y Leonel na kes primere óne, y uns óne depos, Zé António, Tito Paris, Toy Vieira y Toy Paris. Txeu da kes álbun de Bana y Luis Morais, ten ese núkliu kome baze instrumental y Paulino kome arranjador, ke nome de Voz de Cabo Verde o nãu.
Otes izenple de álbun dese altura ke Paulino kordenâ é kes dôs primere LP de Teté Alhinho y N ka por si, de Zeca y Zezé de Nha Reinalda. É de referi inda, kel LP Peace, Love and Unity, onde ke, kome prudutor, Paulino riuni dezénas de vóz na kumunidade kabeverdiana na Mérka, alen de artistas konsagróde móda Ildo Lobo, Zeca de Nha Reinalda y txeu otes. Kel LP foi gravóde parte na Mérka y parte na Purtugal y lansóde na 1990 pa asosiasãu Help CV.
Paulino, el prope, perdê kónta de tónte diske ke já el pruduzi, arranjâ y gravâ, móda el revelâ na altura de lansamente de sê álbun Nha Primeiro Lar. Txeu vez, pamode sê solidariedade puru, apezar de muzka ser sê prufisãu desde jóven “N ta rekonhesê ke senpre N vivê ke difikuldade finansere pamode N trabadjâ kuaze senpre ma jente ke ka tinha ipótese de pagâ. Y mi, N ka ta podê resebê de algen ke ka ten kondisãu de pagâ, y de mesme fórma, N ka podê txâ de ajeda-l pur ise. O ke denher, o sen denher” (Novo Jornal Cabo Verde, 17.07.1996).
Ese desprendimente y sintide de solidariedade universal prufunde é manifestóde pa muzke na txeu deklarasãu, móda na ese izenple li: “Mi, só N krê ser un boa pesoa pa umanidade. N ta utiliza muzka só pa N txegâ na jente. Muzka é móda se el fose nha enxada de trabódje. N krê ser un kabeverdiane ke ta podê falâ pa kabeverdiane y pa munde intere, ke ta konsigi transmiti un sérte mensaja de paz y uniãu”, deklarasãu fete na un entrevista ma Vuca Pinheiro (Farol, Junho 1990).
“Mi, só N krê ser un boa pesoa pa umanidade. N ta utiliza muzka só pa N txegâ na jente. Muzka é móda se el fose nha enxada de trabódje.”
Paulino Vieira na jornal Farol (junho 1990).
Na prinsípie de ónes 1990, kel tenpe de txeu kolaborasãu de Paulino na gravasãu na Lisboa ta txegâ na fin, pamode el ta kumesâ de trabadjâ ma Cesária Évora. Depôs de sê partisipasãu (pióne y gaita) na Mar Azul, entre otes múzikes kunvidóde, el ta partisipâ na Miss perfumado, kel álbun ke konsagrâ Cesária internasionalmente. Kel álbun ke gravóde, na Junhe de 1992, ten pratikamente só kes dôs armon Vieira kome múzikes. Es ta alternâ na kes instrumente de kórda y pióne y Paulino ta fazê prudusãu muzikal. Malaquias Costa ta partisipâ pontualmente na alguns téma ke (rabéka) y Skabexe (réku-réku). Kel tournée ke kontesê ke lansamente da kel diske durâ sérka de dôs óne. Pa len da kes dôs armon, kel konjunte tinha Armando Tito y Vaiss, y otes múzikes na sértes konserte, móda Luis Morais y Bau na kel CD gravóde au vive na Olympia na Paris, na 1993. Kel álbun Cesária (1995), ke Paulino diriji, ta mantê kel grupe de tournée kome baze. El ten partisipasãu pontual de otes múzikes. Durante kes konserte, Paulino alen de tokâ, el ta parsê móda un “elu de ligasãu” entre Cesária, sê feitiu nunka foi de dâ xou, y públike, “pa ela dezenvolvê y mostrâ kezê ke ela é” (Novo Jornal Cabo Verde, 06.11.1993). “Un fórma de orientâ stóde de’ spírite de Cesária y trâ másime partide d’ise”, Paulino ta referi na altura. Enkuante Cize tava deskansâ uns minute ta femâ y temâ uns kóke (na kel tenpe ainda es tava po-l un garrafa de konháke na ménza, na palke), Paulino tava solâ na pióne, el tava brinkâ ta anima plateia, y kónde el afastâ, Totinho é ke fekâ ta fazê ese papel.
Ese intervensãu de Paulino devê ter side mutive de konflite ke parsê na 1996 entre Paulino Vieira y enprezáriu Djô da Silva, ke fazê Paulino afastâ de karrera de Cize. Móda Silva dezê, “Paulino tava asumi un protagonisme demás” (Público, 12.02.1997). Nun entrevista na RDP África (29.06.1997) Paulino ta kontâ: “Kónde es konvidó-m, N bai pa brilhantâ y pô Cesária ta funsionâ (ten kuate, sinke óne ke el ka tava ta funsionâ (…) kónde susése kumesâ, N kria pa no bai devagar, invertê situasãu, ditâ régra (…) N ka ta kolaborâ ma ukê ke ka ta kondizê ke nha sensibilidade”.
É nese altura ke Paulino Vieira ta despoletâ kel kaze de muzka “Sodade” (susése na voz de Cesária na diske Miss perfumado, tâ kestionâ autoria da kel konpozisãu y ta afirmâ ke el é de Armando Zeferino, komersiante de aldeia de Praia Branka (Público, 08.01.1997; A Semana 10.05.2002). Kel kaze ta bai parâ na tribunal. Entretante, Paulino, ke txeu vez manifestâ kóntra Lusafrica y enprezáriu Djô da Silva na inprénsa kabeverdiane, ta kabâ pa verâ kóntra Zeferino ke el tinha tentóde jedâ antes ke kel denúnsia (A Semana, 20.08.2010 y 10.09.2010).
Sobre ses diske a sole, Paulino Vieira ta streiâ ke un single gravóde na 1978, São Silvestre, onde é ke el ta tokâ tude instrumente, uke provokâ un komentáriu na Voz di Povo, (21.03.1979), pamode, provavelmente foi primere vez ke kontesê na diske de artista kabeverdiane. Kes ote álbun ke sigi, tanben foi gravóde só pa Paulino, y só pontualmente el tive kolaborador.
Na 1984, ta sei M’cria Ser Poeta, un LP ke alguns konpozisãu – “M’cria ser poeta” y “Prece di um fidjo (Alo Cabo Verde), pur izenple – ta ser gravóde un monte de vez pa txeu intérprete durante txeu óne, ke faze-s verâ uns klásike. Na 1996, ta sei Nha Primeiro Lar, onde artista ta omenajiâ sê pai, y el trabadjâ na el durante txeu óne. Na kel mesme óne, ta sei de Lusafrica, kel single Boas Festas¸ má Paulino ka gostâ de sê distribuisãu, uke pur ventura omentâ sê dezentendimente ma Lusafrica (Público, 08.01.1997).
Apartir de 2003, pamode sê atitude krítike sobre kes editora diskográfike, Paulino ta pasâ ta editâ sês diske pa sê kónta y el ta distribui-s de fórma alternative. Kel primere dese série, Paulino Vieira na sua Aprendizagem vol. I – Guitarra klásiku, é sê primere álbun ke ê só instrumente, móda kes ke sigi y el ta trazê un sekuénsia de 25 téma interpretóde na vióla de 12 kórda. Paulino ta anunsiâ otes volume, ke parsê ser un série, ke ta inkluí otes instrumente. Depôs sei un single, ta omenajiâ Mestre Baptista, konstrutor de instrumente, y Recordança, es dôs na 2007, y três óne depôs, sei Paulino Vieira.
Disku iditadu
Múzikas
Anjo Luminoso; Arca Azul; Cinderela; Criolo é Sabe; Desuspero; Dia Já Manxê; Encontrarei o amor; Felicidade Já Tchgâ na Mim; Goenta Canela; Grande Fôque; Love, Peace and Unity; M´Cria Ser Poeta; Maria Ô; Melodia d´Esperança; Natal (Meu Irmãozinho Bebé); Naufrágio; Nha Primeiro Lar; Nostalgia; Odie Ê Pobreza; Olim tâ Bai Cheio di Sodade; Pâ independência; Panha Calode; Percussão; Praga de Burro; Prêce di um Fidjo (Alo Cabo Verde, Hello CV); Puntim+Puntim; Quant na Um; Seus Pais Não São os Meus; Sol di Manhã; Solidão; Sou atrevido; Tchadinha; Trabaia pa nos Terra; Um Minute d´Silence; Um Sonho Cordode.