Tradusãu: Karina Monteiro. Revisãu: Nezi Brito

Inácia Maria Gomes Correia 

Tarrafal, Santiagu, 1925 – Praia, Santiago, 2011 

Batukadera, konpuzitora di finason 

Nha Násia Gomi é un referénsia na mundu di batuku y di finason. Si stória kumesa desdi pikinóti na kunpanha ses irmon más grandi pa katisismu, úniku kontatu k’e tevi ku kalker tipu di ensinu formal, pamódi nunka e ka bai skóla. Dipos di aula, e ta pasaba réstu di dia ta dikora dotrina katóliku y ku si imajinason e kria ses primeru trabadju(kriason). 

Kantu e staba li pa se 15 anu, duranti un fésta di kazamentu, ki e entra na tereru di batuku pa primeru bes e mostra tantu kapasidadi di inpruvizason ki tudu mundu spanta, te el mé, sima el própi ben dimiti. Un kantadera di txeu valor, “Nha Tcheka Oliveira,” tenta dispreza-l, kantu e fla “óras ki tubaron entra na portu, txixaru ten ki sai”. Ma, sima própi Násia Gomi ta flaba, tereru ka di-meu, ka di-nhos (ker dizer ma tereru ka ten donu). Alén di keli, si mai dja vizaba-el tanbe “ma rapariga ki entra na tereru di noti, ta sai di la ti sedu palmanhan, pa ivita kria okazion pa fase kuza mariadu. Pur isu, joven Násia Gomi kanta ti sol sai y desdi di la nunka más e ka pára. 

Na dékada di 1980, investigador Tomé Varela da Silva fasi rákodja ku rijistu sonoru di ses kantiga. Di li é ki ben ruzulta kel livru Finason di Nha Násia Gomi (1988), ki  len di ses dadu biográfiku, e ta traze transkrison di ses kantiga. Kes testu li ta revela, na fórma di konsedju y refleson, un universu temátiku, nundi, na meiu di kes kiston sosial, ikonómiku ô di relasionamentu umanu y di muméntu di afirmason di se própi kabésa, ta distaka tanbe si relijozidadi. Násia Gomi, munti bes, ta ripiti kusas ki santus katóliku ta fla y ta pidi Nhu San Salbador di Mundu grasa y salvason, kusa ki ta leba-nu konklui ma rejeson di batuku pa igreja katóliku ka konprometi divuson di povu. 

Inbóra  si inportánsia na ilha di Santiagu, konvidadu ku frekênsia pa anima féstas, si vós so ben parsi na disku na 1994, ku dos trexu di finason na un CD iditadu na Suésia – Music from Cape Verde – ki, na prinsipiu, sai so na sirkuitu ristritu di distribuison promosional. E pasa ta sta di bénda so na 1998. Kes gravason, ku partisipason di família y vizinhus, fazedu na Ribera Séka. É nes lugar ki matriarka di finason vive, duranti anus ku si maridu, fidju fémia y kuatu nétu na un kasa ki ka tinha poku kondison. 

Na prinsipiu di 1997, Násia Gomi resebi di konpanhia aériu kabuverdianu, ku apoiu di alguns inpreza y instituison, un kaza di dós pizu, na lokalidadi di Txada Fátima, Santa Kruz, pa si papel na kultura kabuverdianu y pamódi era madrinha di un avion kunpradu pa kel inpréza. Nes mesmu anu e fika viúva, di lutu, e tuntunhi na partisipa na reprezentason di Kabu Verdi na spozison universal di 1998, na Lisboa. Ma, na fin di kónta, vontadi di kanta éra más grandi, y Nha Násia Gomi reprizenta si kabésa na spetaklu Camin di mar un “opereta” produzidu pa grupu Simentera ki ta konta stória de múzika kauverdiánu. 

Násia Gomi mori di AVC, ku 85 anu, 3 di Febreru di 2011. 

Disku

• Nácia Gomi cu sê mocinhos, CD, ZO/SA, Amadora, 2000.
• Finkadus na raiz (com Ntóni Denti d’Oru), AV Produções, 2005.
• Partisipasãu na CD Music from Cape Verde, Caprice Records, Estocolmo, 1994.
• Partisipasãu na CD Cap-Vert – Un archipel de musiques, CD, Ocora Radio France, 2000.
• Parseria ku Ferro Gaita y partisipasãu na múzika “A’ Nacia Gomi”, na CD di Ferro Gaita Rei di Tabanka, 1999.

Pa konxi más

Odja y obi