Atxadu Kabu Verdi.
English version available here.
Fundasãu di Ribera Grandi, primeru sidadi kriadu na Áfrika pa eropeu y primeru kapital di Kabu Verdi.
Se nómi ofisial, a partir di 2005, pasa ta ser Ribera Grandi Di Santiagu. É mas konxedu pa Sidadi Velha.
NA MUNDU Purtugal y Spanha sinaTratadu di Tordizilha, ki ta dividi mundu na nos dos metadi ku bazi nun linha ki ta pasa 370 légua na oesti di Santu Antãu. Asin, tudu térra diskubridu y pa diskubri ki ta fika ladu osidental de kel miridianu ta pertense Spanha y tudu diskubridu y pa diskubri ki ta fika di ladu oriental é di Purtugal
Konstrusãu di kapéla di Nósa Sinhóra di Ruzáriu ki birâ greja na 1652. El é greja más antigu di Kabu Verdi.
“Ribera Grandi foi, sin, mosinhus, palku di enkontru di txeu variadadi di múzika; primeru di tudu, múzika ibériku, . Fontis ta da-nu kónta di vióla di biku, di tanbor, di pifru, trazedu pa un monti marinheru ki ta povoaba ruas ki éra kuazi anfibiu di rua di Portu y di Kalhau. Otus instrumentu ben pa via di kleru ki ta kultivaba múzika maravilhozu, na prátika katóliku ki ta gosta di fésta animadu ku flauta, tronbeti baixãu, sakabuxas, fagotis y tenores. Mesmu ki informasãu ki tendu ka ser txeu y raru sobre es asuntu, nu ten razãu pa pensa ma Ribera Grandi tenba ki ser un sidadi di múzika, ó mesmu un babel di múzika (…)”
António Correia e Silva, na óbra Combates pela História
NA MUNDU Dia 22 di Abril é dia ki purtugês txigâ un térra, txumadu oji Brazil, nun viaji pa India, ki Pedro Álvares Cabral komanda.
Kriasãu di diosézi di Santiagu – Pa Bula 13 di Janeru di kel ánu li, pa meiu di Bula Pio Excllenti, Papa Clemente VII kria diosézi di Santiagu.
Nes mesmu data, Vila di Ribera Grandi promovedu (de juris) pa katiguria di sidadi.
Prátika di múzika – Padri António Vieira konta ma na Ribeira Grande tenba “(…) klérigus y kónigus negru sima zibitxi (kónta d´ódju); má tãu ben idukadus, tãu ruspetadus, tãu intilijentis, sabedoris, tãu grandis múzikus, tãu rakatadus y tãu moderadus, ki pode da kes ki ta sta nos Katedral inveja”.
Ta parse ma kel li é informarsãu más antigu ki tendu sobri stória di prátika di múzika na Kabu Verdi.
Vila di Praia – Dia 18 di Dizénbru di 1769, na ténpu di governador Joaquim Salema de Saldanha Lobo, transfiridu diministrasãu sentral (sédi di guvérnu di Kabu Verdi) di sidadi di Ribera Grandi pa Vila di Praia.
Batuku proibidu: dia 16 di Seténbru di 1772, governador Joaquim Salema de Saldanha Lobo proíbi “Zanbunas, Txorus y Renadu na Santiagu”.
“Zanbunas” é nómi ki na kel ténpu ta dada prátika di batuku, purtantu kel ki pode ser referensia stóriku mas antigu di es fórma muzikal.
“N ta da moradoris des ilha kunhisimentu ki di tantu kantu N sabe y ten stadu ta odja, ten sénpri dizordi provokadu pa Renadu y Zambunas públiku ki ta fazedu di noti, ku tantu izajeru ki ta kaba pa tudu mutivu ser skandoluzu pa Deus, y perturbador di lei y suségu públiku…”
